Омодагии Беларус ба чорабиниҳои ҲХДТ

Душанбе,10 апрел. (АМИТ «Ховар», Фарзонаи Давлат)- Имрӯз дар Сафорати Ҷумҳурии Беларус дар Тоҷикистон муовини раиси Ҳизби халқии демократии Тоҷикистон Асрор Латипов бо мушовири сафорат Олег Вонсяк мулоқот анҷом дод. Зимни мулоқот ҷонибҳо оид ба муносибатҳои дуҷониба миёни Тоҷикистон ва Беларус ибрози назар карда, аз самараи ҳамкориҳо изҳори қаноатмандӣ намуданд. Намояндаи Беларус Олег Вонсяк ҳамкории байниҳизбиро зарур ва боиси дастгирӣ хонд ва пешниҳод намуд, то миёни ҷавонон, аз ҷумла ҷавонони ҳизбӣ ҳамкориҳо ба роҳ монда шаванд. Дар ҷараёни мулоқот намояндаи сафорат омодагии ҷониби кишварашро барои иштирок дар чорабиниҳои Ҳизби Халқии Демократии Тоҷикистон баён дошт.