Равияҳои нави ҳамкориҳои байниминтақавии Тоҷикистону Русия

Душанбе, 5 апрел. (АМИТ «Ховар»).-5 апрели соли 2013 дар шаҳри Душанбе таҳти унвони “Равияҳои нави ҳамкориҳои байниминтақавии Тоҷикистону Русия” конфронси байналмилалӣ ба кори худ шуруъ кард. Дар кори конфронси мазкур намояндагони мақомоти марказӣ ва маҳаллии ҳокимияти давлатии Ҷумҳурии Тоҷикистон ва Федератсияи Русия, доираҳои соҳибкорӣ, намояндагони ташкилотҳои ҷамъиятӣ, доираҳои олимон ва коршинсон, ВАО иштирок менамоянд. Мавзуъҳои калидии конфронс дурнамои рушди ҳамкориҳои Тоҷикистону Русия, таҳияи афзори самараноки идораи захираҳои башарӣ ва масъалаҳои муҳоҷирати меҳнатӣ, рушди соҳаҳои анъанавӣ ва нави иқтисод, ҳамкориҳои фарҳангӣ ва башарӣ мебошанд. Ҳамзамон дар ҳошияи ин конфронс 4 мизи мудаввар таҳти мавзуъҳои “Нақши ҳамкориҳои байниминтақавӣ ҳангоми равандҳои ҳамгироӣ дар паҳнои ИДМ”, “Таъсири муҳоҷирати меҳнатӣ ба усулҳои ҳамкории байниминтақавӣ дар шароити равандҳои ҳамгироӣ”, “Нақши бахши бонкӣ-молиявӣ дар рушди ҳамкории байниминтақавии Тоҷикистону Русия” ва “Арзёбии паҳлуҳои башарӣ ва фарҳангии ҳамкориҳои байниминтақавӣ” баргузор мегарданд. 6 апрел дар чаҳорчӯбаи ин чорабинӣ иштироккунандагони конфронс аз Минтақаи озоди иқтисодии “Данғара” дидан менамоянд.