Тоҷикистон шомили даҳгонаи кишварҳои ҷолиби барои туристон

Душанбе, 15 январ. (АМИТ «Ховар», Фарзона Ашӯрмадова).-Сомонаи интернетии GlobeSpots, ки туристони мустақилро муттаҳид мекунад, Тоҷикистонро дар сархати кишварҳои ҷолиб барои туристони саргузаштӣ дар соли 2014 қарор додааст.Ба иттилои GlobeSpots Тоҷикистон баъди Малта дуюмин кишварест, ки барои туристони саргузаштӣ хеле мусоид мебошад. Манбаъ таъкид мекунад, Тоҷикистон кишварест, ки бо Афғонистон, Қирғизистон, Ӯзбекистон ва Чин ҳамсарҳад мебошад ва ҳар туристи дӯстдори истироҳати фаъолро мафтун мекунад.Дар мавриди тоҷикистониён масъулини GlobeSpots навиштаанд, ки мисли мардуми дигари Осиёи Марказӣ хеле меҳрубону меҳмондӯст мебошанд. Манзараҳои Тоҷикистон ягон касро бетараф намемонанд. Пиряхҳо, кӯлҳои мусаффои куҳҳо, даштҳо ва чарогоҳҳои сабз, ки барои тамошои онҳо метавонед бо дучарха, мошин, аспу хар ва пиёда равед. Роҳ ба Помир, ки аз миёни куҳсорони шарқу ҷануби кишвар мегузарад яке аз ҷойҳои машҳур барои саёҳати саргузаштӣ мебошад.GlobeSpots баробари Тоҷикистон ба даҳгонаи кишварҳои ҷолиб барои туризм Малта, Руминия, Серра-Леон, Индонезия, Литва, Ҳаитӣ, Сан-Том, Шпитсберген ва Бонайрро ворид кардааст.