Ҷамъбасти маҳфили ҷумҳуриявии сайёҳон-кишваршиносон

Душанбе, 29.04.2014. (АМИТ “Ховар”, Назир Назиров).-Аз 25 то 27 апрели соли равон дар Маркази ҷумҳуриявии муассисаҳои таҳсилоти иловагии Вазорати маорифи Ҷумҳурии Тоҷикистон маҳфили ҷумҳуриявии сайёҳон-кишваршиносони наврас дар доираи экспедитсияи XV1-уми ҷумҳуриявии сайёҳию кишваршиносии мактаббачагон таҳти шиори «Тоҷикистон-кишвари азизи ман» баргузор шуд.Мақсад аз баргузории чорабинӣ — муайян намудани беҳтарин гурўҳҳои экспедитсионӣ, маҳфилҳои сайёҳию кишваршиносӣ, шуъба, клуб, осорхонаҳои мактабӣ; такмили малакаю маҳорати сайёҳӣ, кишваршиносӣ, ҷўяндагӣ ва муҳаққиқӣ дар байни наврасон, ҷавонон ва омўзгорон; ташаккули тарбия ва маърифати экологӣ байни қишрҳои гуногуни ҷомеа мебошад.Маҳфил аз номгӯйҳои «Таърихӣ-кишваршиносӣ», «Мардумшиносӣ ва бостоншиносӣ», «Адабиёт ва санъат», «Экология ва ҳифзи табиат», «Осорхонаи мактабӣ», «Маҳорати сайёҳӣ», «Бахши роҳбарон» иборат буд.