«Ҷило»-и «Сафина» байналмилалӣ шуд

Душанбе, 14.04.2014 (АМИТ «Ховар», Фарзонаи Давлат).- Бо ибтикори Муассисаи давлатии телевизиони «Сафина» дар ҳамкорӣ бо телевизиони «Тулуъ»-и Ҷумҳурии Исломии Афғонистон «Ҷило-2014», дуюмин ҷашнвораи ҳарсолаи ҷоизаи ифтихории байналмилалӣ барои пешрафти санъат ва фарҳанги кишвар, ки муддати як сол идома дошт, рӯзи 12-уми апрел дар «Душанбе-плаза»-и пойтахт аз рўи 12 номгӯй ҷамъбаст гардид. 
Зимни натиҷагирӣ аз озмуни «Ҷило-2014» Давлатманди Хол ҷоизаи «Шахсияти сол», Сиддиқи Шубобу, Нигора Холова ҷоизаи «Оҳанги Шарқ» ва Фарҳоди Дарё «Ситораи бузурги мусиқии форсӣ»-ро ба даст оварданд.
Ҳамин тавр, дар бахши «ТВ ва радио» ҷоизаҳои «Барномаи беҳтарини радиоӣ», барномаи субҳгоҳии «Саломалейкум диёрам»-и радиои «Азия плюс», беҳтарин радиожурналист Шарифи Мирсаидзод, хабарнигори радиои «Садои Душанбе», «Беҳтарин баромаи телевизионӣ» барномаи «Сиришти сафина»-и ТВ «Сафина» ва «Беҳтарин тележурналист»-ро Зафар Саидов ва Аҳлиддини Тоҳир — хабарнигорони телевизиони «Ҷаҳоннамо» ба даст оварданд.
Тавре ки директори «ТВС» Лутфулло Давлатзода хабар дод, дар лоиҳаи телевизионии «Ҷило-2014», ки имсол мақоми байналмилалиро гирифт, беш аз 200 довталаб аз хориҷ ва дохили кишвар иштирок намуда, аз миёни онҳо ба 36 иштирокчии он муяссар гардид, ки ҷоизаи «Ҷило»-ро дар вазифаҳои худ ба даст оранд.