Фаронсавиҳо дар Душанбе корхона месозанд

Душанбе, 18.04.2011.(АМИТ «Ховар», Марзия Саидзода).-Тақвияти ҳамкориҳои шаҳрдории Душанбе бо ширкати фаронсавии «Итрон Франс» дар ҷараёни мулоқоти раиси шаҳри Душанбе бо мудири ширкати мазкур Карим Беннинӣ дар Душанбе матраҳ гардид.
Маҳмадсаид Убайдуллоев аз сифати корҳои анҷомдодаи ширкати «Итрон Франс» дар доираи татбиқи қарордоди DWSP2-01 «Лоиҳаи дуюми обтаъминкунии шаҳри Душанбе оид ба таҳвили 76 500 адад обҳисобкунаки ҳуҷравӣ ба КВД «Обу корези Душанбе»» изҳори қаноатмандӣ намуд. Мавсуф зикр кард, ки барои кам кардани талафот ва сарфаи оби истеҳсолшуда тавассути насби ҳисобкунакҳои обӣ, инчунин беҳдошти сатҳи хизматрасонӣ ба сокинон, шаҳрдорӣ омодааст ҳамкории мутақобилан судамандро бо ин ширкати фаронсавӣ тақвият бахшад. Дар ин росто дар мулоқот  масоили ташкили корхонаи муштараки насб ва таъмири ҳисобкунакҳои обӣ дар Душанбе матраҳ шуд. Дар иртибот ба амалисозии он ҷонибҳо ба хулоса расиданд, ки гурӯҳи кории муштарак ҷузъиёт ва асосҳои техникии масъаларо таҳлил намояд ва ба унвонии шаҳрдорӣ пешниҳод созад.
Карим Беннинӣ, ки  мудири ширкати «Итрон  Франс» оид ба фурӯш дар кишварҳои Иттиҳоди давлатҳои мустақил, Аврупои Марказӣ, Баҳри Миёназамин ва Скандинавия аст, гуфт, ки тамоми зарфият ва таҷрибаашро барои тавсеаи ҳамкориҳо дар оянда равона хоҳад кард.