Созишномаи байниҳукуматӣ оид ба суғуртаи иҷтимоӣ ва нафақа

    Душанбе, 18.04.2014. (АМИТ «Ховар», Лайло Тоирӣ).-Яке аз масъалаҳои ҳалталаб дар шароити муосир бо суғуртаи иҷтимоӣ ва суғуртаи тиббӣ фаро гирифтани муҳоҷирони меҳнатӣ-шаҳрвандони Ҷумҳурии Тоҷикистон дар хориҷа мебошад. 
Бо мақсади беҳтар намудани сифати хизматрасонии тиббӣ ба муҳоҷирони меҳнатӣ лоиҳаи Созишнома ба эътирофи якҷояи хулосаҳои тиббӣ оид ба ҳолати саломатии муҳоҷирони меҳнатӣ дар давлатҳои аъзои Иттиҳоди иқтисодии Аврупо ва Осиё (ЕврАзЭС) таҳия гардида, аз тарафи Комиссияи доимии намояндагон дар назди Иттиҳоди иқтисоии Аврупо ва Осиё тасдиқ гардидааст.
  Дар айни замон, тибқи маълумоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳуҷҷати мазкур дар сатҳи мувофиқаи байнидавлатӣ қарор дорад.
 Мутобиқи моддаи 3 Қонуни Федералӣ «Дар бораи нафақаҳои меҳнатӣ дар Федератсияи Русия» шаҳрвандони хориҷӣ ва шахсони бетабаа, ки доимӣ дар Федератсияи Русия будубош менамоянд, ба нафақаи меҳнатии ин давлат ҳуқуқ доранд. 
Шаҳрвандони Ҷумҳурии Тоҷикистон низ ҳангоми ба синни нафақа расидан ва дар сурати зисти доимӣ дар ҳудуди Федератсияи Русия ҳуқуқ доранд соҳиби нафақаи ин давлат гарданд.
Аксари шаҳрвандони кишварамон, ки аз тариқи иҷозат барои кор дар Федератсияи Русия муваққатан фаъолияти корӣ менамоянд ва пардохтҳои заруриро ба фонди нафақаи ин давлат адо менамоянд, бинобар набудани созишномаи байнидавлатӣ аз ин имтиёз маҳрум мебошанд.  Аз ин лиҳоз зарурат ба миён омадааст, ки аз ҷониби мақомоти ваколатдори давлатӣ дар соҳаи нафақа ҷиҳати фаро гирифтани муҳоҷирони меҳнатӣ — шаҳрвандони Ҷумҳурии Тоҷикистон бо нафақа, Созишномаи байниҳукуматӣ оид ба суғуртаи иҷтимоӣ ва нафақа байни Федератсияи Русия ва Ҷумҳурии Тоҷикистон таҳия ва ба имзо расонида шавад.