18 май — Рӯзи дави миллӣ

Душанбе, 13.05.2014. (АМИТ «Ховар). – Имсол дар  Тоҷикистон Рӯзи  дави  миллӣ 18 май  баргузор  мешавад.
Тавре  ки аз  Кумитаи ҷавонон,  варзиш ва  сайёҳии  назди  Ҳукумати Ҷумҳурии  Тоҷикистон  хабар  доданд, ҳар  сол  рӯзи дав дар ҳошияи Рӯзи ҷавонони  Тоҷикистон  дар  саросари  кишвар   роҳандозӣ  мешавад.
Дар  шаҳри  Душанбе  иштирокдорони  дав  мусобиқаро  аз маҳаллаи  «Чорбоғ» — и ноҳияи Варзоб  оғоз  намуда, онро  дар «Наврӯзгоҳ» —  и  пойтахт  анҷом  медиҳанд. 
Иштироккунандагони  дави  миллӣ аз рӯи  анъана  масофаҳои 3,5 ва 10  километрро тай  мекунанд.  Дар дави  миллӣ  намояндагони  ҳамаи  гурӯҳи  аҳолӣ  аз роҳбарони  вилояту  ноҳияҳо то кӯдакони  хурдсол иштирок  намуда, ғолибони  он бо мукофотҳо  қадр  карда  мешаванд.
Хотирнишон  месозем, ки  дави  миллӣ бо дастури Президенти  Тоҷикистон  сар  аз соли 2007  моҳи  май  дар  ҳамаи  ноҳияю  шаҳрҳои  кишвар баргузор  мегардад.