Дар Суғд беш аз 37 кг ҳашиш мусодира шуд

Душанбе, 12.05.2014. (АМИТ «Ховар», Муқаддас Темурзода). — Тавре ки маркази матбуоти ВКД хабар медиҳад, ҳангоми гузаронидани чорабиниҳои фаврӣ-ҷустуҷӯӣ дар ҳудуди шаҳри Хуҷанд аз ҷониби кормандони милитсия бо гумони даст доштан дар муомилоти ғайриқонунии маводи нашъадор шаҳрванд Маъруф Шарифов, соли таваллудаш 1964, сокини шаҳри Истаравшан, ки пеш бо моддаи 200 қисми 4 КҶ Ҷумҳурии Тоҷикистон суд шудааст,  дастгир гардид. Ҳангоми кофтукови шахсӣ аз ў дар маҷмӯъ 36 кг 790 г маводи  нашъадори ҳашиш дарёфт ва мусодира шуд.
«Ҳамчунин зимни гузаронидани як чорабинии фаврии дигар дар шаҳри Конибодом кормандони милитсия бо ҷурми даст доштан дар ин гуна ҷиноят сокини шаҳри Хуҷанд Ҷаҳонгир Имомқулов, соли таваллудаш 1983-ро дастгир намуданд. Дар вақти кофтукови шахсӣ аз борхалтаи ў 838-грамм маводи  нашъадори ҳашиш дарёфт ва мусодира гардид.
Бояд зикр намуд, ки маводи нашъадори мусодира шуда дар маҷмӯъ 37 кг 628 граммро ташкил дод. 
Нисбат ба далелҳои мазкур парвандаи ҷиноӣ оғоз гардида, тафтиш идома дорад», — зикр менамояд сарчашма.