Идрорпулии раиси вилояти Суғд ба 26 нафар

Душанбе,12.05.2014.(АМИТ «Ховар», Раъно Нусратуллозода).- 21 нафар донишҷӯи Донишгоҳи давлатии Хуҷанд ба номи академик Бобоҷон  Ғафуров баъди гузаштан аз се даври озмун, чун гирандагони идрорпулии раиси вилоят муайян гардиданд.  Ҳамчунин як нафар магистрант ва 4 нафар аспиранти ин донишгоҳ  ба чунин идрорпулӣ дастёб шуданд. Дар дунболи ин 10 нафар донишҷӯи ин донишгоҳ  аз раиси шаҳри Хуҷанд ва 7 нафар аз раиси ноҳияи Бобоҷон Ғафуров барои гирифтани идрорпулӣ, дар даври ниҳоии озмун ғолиб баромадаанд. 
Тавре ки сардори Маркази иттилоот ва таҳлили раёсати донишгоҳ  Маъмури Юсуфзод иттилоъ дод, тибқи қарори раиси вилояти Суғд дар соли хониши 2013-2014 барои донишҷӯёну аспирантони фаъоли муассисаҳои таҳсилоти олӣ ва миёнаи касбии вилоят идрорпулиҳо таъсис шуда, тибқи муқаррарот донишҷӯёни курсҳои 2, 3 ва 4, ки аз фанҳои таълимӣ 75 фоиз баҳои аъло доранд, аз тариқи ғолибият дар озмун метавонанд идрорпулиҳои раиси вилоятро дарёфт намоянд.
Маврид ба зикр аст, ки дар соли хониши 2013 — 2014 барои донишҷӯён ва аспирантон 100 адад идрорпулӣ муқаррар шудааст. Як идрорпулии раиси вилоят барои аспирантон 1000 сомонӣ ва барои донишҷӯён 800 сомонӣ муайян шудааст, ки ҳамагӣ як маротиба дода мешавад.