Конфронс бахшида ба 100-солагии З.Шаҳидӣ

     Душанбе, 07.05.2014. (АМИТ «Ховар», Раъно Нусратуллозода).- Ба ифтихори таҷлили 100-солагии композитор Зиёдулло Шаҳидӣ дирӯз дар Муассисаи давлатии «Мактаб-интернати миёнаи махсуси мусиқии ҷумҳуриявии ба номи Зиёдулло Шаҳидӣ» бо иштироки намояндагони  аҳли ҷамоат ва муассисаҳои таълимию фарҳангӣ конфронс баргузор гардид. Дар конфронс маърӯзаҳои илмии устодону шогирдон  дар мавзӯи «Зиёдулло Шаҳидӣ — композитор»,  «Зиёдулло Шаҳидӣ мусиқишинос ва мураббӣ», «Эҷодиёти камеравию вокалии Зиёдулло Шаҳидӣ», «Эҷодиёти операвии Зиёдулло Шаҳидӣ» пешниҳод гардиданд. Инчунин дар муассиса гӯшаи махсус таъсис дода шуд, ки ба ҳаёт ва фаъолияти оҳангсози маъруф Зиёдулло Шаҳидӣ бахшида шудааст.
Дар ҷамъомад порчаҳо аз филмҳое, ки ба ҳаёти Зиёдулло Шаҳидӣ бахшида шуда буданд, намоиш дода шуданд. 
Инчунин дар ин рӯз дар Муассисаи давлатии «Мактаб-интернати миёнаи махсуси санъати ҷумҳуриявии ба номи Миратулло Атоев бахшида ба 100-солагии композитори маъруф Зиёдулло Шаҳидӣ маҳфили адабӣ баргузор гардид. Баъди бахши назарияи мусиқӣ, ки ба ҳаёт ва фаъолият, сурудҳои офарида, мусиқии камеравӣ ва операҳои Зиёдулло Шаҳидӣ бахшида шуданд, барномаи консертӣ доир гашт. Дар барномаи консертӣ асарҳои Зиёдулло Шаҳидӣ «Алла», «Дорад ҳавас», «Муҳаббат», «Ситораи ман», «Дар лаби обе», «Хонаи мо», «Офарин»  дар иҷрои хонандагони мактаб таҳти сарварии устодони ҳунар садо доданд.