Машварати омӯзишӣ дар Хадамоти муҳоҷират

Душанбе, 07.05.2014. (АМИТ «Ховар», Мавҷуда Анварӣ). -Имрӯз дар   Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон бо иштироки кормандони Хадамоти муҳоҷират, коршиносони байналмилалии муҳоҷират ва намояндагони ташкилотҳои ғайридавлатӣ дар самти муҳоҷират машварати омӯзишӣ доир гардид.
Парвиз Ҳакимов, мушовири байналмилалӣ барномаи лоиҳаро муаррифӣ намуд. Елманова Татьяна Викторовна мушовири байналмилалии Лоиҳа оид ба низоми мониторинг ва баҳодиҳӣ бо мақсади баланд бардоштани низоми назорати равандҳои муҳоҷират сухан гуфт. Масъалаҳои  «Иттилоотонии Хадамоти муҳоҷират ҳамчун омили рушди босубот», «Тавсияҳо оид ба стратегияи коммуникатсионии Хадамоти муҳоҷират», «Дастур оид ба ташкил ва гузаронидани тренингҳо барои муҳоҷирони меҳнатӣ» муҳокима гардиданд. 
Байни иштирокчиёни машварат саволу ҷавоб сурат гирифта, ба кормандони хадамоти муҳоҷират ҷиҳати ба роҳ мондани корти муҳоҷират ва гузаронидани тренингҳо дар байни муҳоҷирони меҳнатӣ тавсияҳо дода шуданд.
Дар ин бора ба АМИТ «Ховар» Абдуллоҳи Қодирӣ, сухангӯи Хадамоти муҳоҷирати Вазорати меҳнат, муҳоҷират ва шуғли аҳолии кишвар хабар дод.