Муаррифии вилояти Тамбов дар Душанбе

Душанбе, 13.05.2014. (АМИТ «Ховар,  Кристина  Эрлих). – 13  ва  14  май Намояндагии  Хадамоти федералии муҳоҷирати Русия  дар  Тоҷикистон  якҷоя бо  Маркази  илму  фарҳанги  Русия  дар  шаҳри  Душанбе,  ҳамчунин  намояндагони Раёсати  меҳнат ва  шуғли  аҳолии  вилояти  Тамбов  ва роҳбарони  маъмуриятҳои  ноҳияҳо  имконоти  иҷтимоию  иқтисодии  вилояти  Тамбови Федератсияи  Русия   барои  ҳамватанони  сокини Тоҷикистонро  муаррифӣ  мекунанд.  Дар  ин  бора  аз Намояндагии  Ҳамкории  Русия  дар  Тоҷикистон  ба  АМИТ «Ховар»  хабар  доданд.
Хотирнишон  месозем, ки  вилояти  Тамбов ниҳоди  Федератсияи Русия  буда,  ба  ҳайати  Округи  марказии федералӣ  шомил  аст. Шаҳри  Тамбов  маркази  маъмурӣ  ба  шумор  меравад. Вилояти  Тамбов  27  сентябри  соли  1937  таъсис  ёфта, 22  июни  соли  1967  бо  ордени  Ленин  мукофотонида шуда буд. 
Вилояти  Тамбов  бо  вилоятҳои  Рязан,  Пенза,  Саратов, Воронеж ва  Липетск  ҳамсарҳад  аст.
Вилояти  Тамбов дар хамгашти  роҳҳои  нақлиётию  бандарӣ мавқеи  қулайи ҷуғрофӣ ва вазъияти  мусоиди экологиро  дошта, аз захираҳои  табиӣ ва  шароити  иқлими  минтақаи  миёнаи  Русия  бархӯрдор   аст, ки  ин  ба  рушди  фаъолияти  хоҷагии он  мусоидат  мекунад.