Мулоқоти Қоҳир Расулзода бо Ню Дун

Душанбе, 13.05.2014 (АМИТ «Ховар», Фарзонаи Давлат).-Имрўз Сарвазири мамлакат Қоҳир Расулзода бо муовини вазири кишоварзии Ҷумҳурии мардумии Чин Ню Дун мулоқот кард.Қоҳир Расулзода дар мулоқот омодагӣ ва ҳавасмандии ҷониби Тоҷикистонро барои рушди муносибатҳо бо кишвари ҳамсоя дар ҳама соҳаҳо, хусусан дар соҳаи кишоварзӣ махсус таъкид намуда, изҳор дошт: «Мо омодаем, ки дар баробари дигар соҳаҳои афзалиятнок барои ҷалби сармояи Ҷумҳурии мардумии Чин барои татбиқи лоиҳаҳои бузурги сармоягузорӣ дар соҳаи кишоварзӣ низ ҳамкорӣ намоем».Ҷонибҳо дар мулоқот тақвияти ҳамкориҳои ду давлатро дар соҳаҳои алоҳидаи кишоварзӣ, ба монанди растанипарварӣ, тухмипарварӣ, чорводорӣ, боғдорӣ ва шоликорӣ бо роҳу усулҳои нав ва ҷалби технологияи ҳозиразамон махсус таъкид намуда, барои беҳдошти шароит ва рушди саноати кишоварзӣ дар Ҷумҳурии Тоҷикистон нуқтаи назари хешро баён доштанд. Дар робита ба ин таъкид шуд, ки бо роҳи ҳамкориҳои судманди дуҷониба фароҳам овардани шароити созгори парвариш ва коркарди доимии маҳсулоти кишоварзӣ, истифодаи мақсадноки заминҳо, ташкили нуқтаҳои нигоҳдории маҳсулот дар ҳама фаслҳои сол, таъмини техника ва таҷҳизоти ҳозиразамони соҳавӣ, ташкили бозомўзӣ ва тарбияи мутахассиони соҳаи кишоварзӣ барои ҳарду ҷониб манфиатовар хоҳад буд.