Нахустин ҷаласаи Комиссияи байниҳукуматии Тоҷикистону АМА

Душанбе, 13.05.2014. (АМИТ «Ховар», Бекназари Абӯбакр). — Ҳайати Ҷумҳурии Тоҷикистон таҳти роҳбарии раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодири Қосим 11 майи соли ҷорӣ барои иштирок дар ҷаласаи якуми Комиссияи байниҳукуматии Тоҷикистону Амороти Муттаҳидаи Араб (АМА) оид ба ҳамкориҳои тиҷоратию иқтисодӣ ва илмию техникӣ ба шаҳри Абу Забии Амороти Муттаҳидаи Араб сафар намуд.
Аз маркази матбуоти Кумитаи сармоягузорӣ ба АМИТ «Ховар» иттилоъ доданд, ки сафари ин ҳайат то 15 май идома карда, дар назар аст, ки дар доираи ҷаласаи мазкур масъалаҳои вобаста ба густариши ҳамкориҳои байни ду кишвар дар соҳаҳои тиҷорат ва иқтисодиёт, сармоягузорӣ, бонкдорӣ, энергетика, саноат, тандурустӣ, маориф ва илм, туризм, фарҳанг ва нақлиёт мавриди баррасӣ қарор гиранд.
Ёдовар мешавем, ки муносибатҳои ҳасана миёни Тоҷикистону Амороти Муттаҳидаи Араб тайи солҳои охир, бахусус баъди сафари расмии Президенти Тоҷикистон Эмомалӣ Раҳмон ба ин кишвар моҳи апрели соли 2007 беш аз пеш вусъати тоза пайдо карда, дар ин самт пешравиҳои назаррас ба чашм мерасанд. Дар ин сафар панҷ шартномаи бағоят муҳим, аз ҷумла оид ба ҳамкориҳои тиҷоратию иқтисодӣ ва илмию техникӣ ба имзо расида буд.
Манбаъ ҳамчунин иттилоъ дод, ки дар доираи сафари мазкур  вохӯриҳои Қодири Қосим бо доираҳои сармоягузории Амороти Муттаҳидаи Араб ба нақша гирифта шудаанд.