Наваскарон қасам ёд карданд

Душанбе, 13.05.2014. (АМИТ «Ховар», Мавҷуда Анварӣ). —  Дирӯз вазири корҳои дохилӣ Раҳимзода Рамазон Ҳамро ба қисми низомии 5453-и Раёсати Қӯшунҳои дохилии Вазорати корҳои дохилӣ (ВКД) омада, наваскаронро ба муносибати қабули Савганди ҳарбӣ табрику муборакбод намуда, зикр кард, ки роҳбарияти ВКД кӯшиш ба харҷ медиҳанд, ки тамоми шароити хубро барои хизмат муҳайё намояд. Ин қисми ҳарбӣ — қисми махсус буда, сарбозон метавонанд баъди адои хизмат, дар оянда ҳамчун милитсионер дар мақомоти корҳои дохилӣ фаъолият намоянд.
Раҳимзода Рамазон Ҳамро пас аз маросими қасамёдкунӣ аз нуқтаи тиббии қисми ҳарбии 5453-и Раёсати Қӯшунҳои дохилӣ, ки нав сохта шудааст, дидан намуд. 
Вазири корҳои дохилӣ аз осоишгоҳи «Садбарг»-и ВКД, ки дар дараи хушманзара ва хушобуҳавои Ромит ҷойгир аст, дидан намуд. Дар айни замон дар ин мавзеъ корҳои ободонӣ ва таъмиру тармим идома дорад. Мавсуф ба хотири боз ҳам беҳтар намудани шароити хизматрасонӣ, ҷойи будубош, ошхона, майдони варзишӣ, ҳавзи шиноварӣ ва дигар иншоотҳо, ки барои истироҳату фароғати кормандони мақомоти корҳои дохилӣ, собиқадорон ва шаҳрвандон пешбинӣ гардидаанд, дастуру супориш дод.