Оғози Рӯзҳои фарҳанги Тоҷикистон дар Чин

 
Душанбе, 14.05.2014 (АМИТ «Ховар»).-  Бо ташаббуси  Вазорати фарҳанги Ҷумҳурии Тоҷикистон, Вазорати фарҳанги Ҷумҳурии Мардумии Чин  ва Сафорати Ҷумҳурии Тоҷикистон дар Пекин 11 майи соли 2014 дар  толори калони намоишгоҳи  «Ҳазораи Чин» маросими кушодашавии Рӯзҳои фарҳанги Тоҷикистон дар Чин баргузор гардид. Вазири фарҳанги Тоҷикистон Шамсиддин Орумбеков зимни ифтитоҳи он сухан гуфт.
Тавре ки аз Сафорати  Ҷумҳурии Тоҷикистон дар Ҷумҳурии Мардумии Чин  хабар доданд, баъдан намоиши рассомони тоҷик  ба маърази тамошои мардуми Чин, намояндагони  сафоратхонаҳо ва намояндагони муқими Чин гузошта шуд. Бегоҳи ҳамон рӯз консерти калони ҳунармандони маъруфи Тоҷикистон бо барномаи рангин намоиш дода шуд.
       Бояд зикр кард, ки меҳмонон ва сокинони Чин аз намоиши расмҳо таассуроти калон бардошта, пас аз тамошои консерти калони ҳунармандони тоҷик кафкӯбиҳои бардавом заданд. Интизор меравад, ки дигар барномаҳои рангине, ки то 17 майи соли ҷорӣ идома хоҳанд ёфт, бо хушнудӣ аз ҷониби мардуми Чин пазируфта шаванд.