Тантана бахшида ба Рӯзи Ғалаба дар намояндагии ДДМ

Душанбе, 12.05.2014. (АМИТ «Ховар, Раъно Нусратуллозода). – Чанде  пеш  дар намояндагии  Донишгоҳи  давлатии  Маскав  ба номи М.В. Ломоносов  воқеъ  дар  шаҳри  Душанбе  бахшида ба  69 – солагии Рӯзи  Ғалаба   маҷлиси ботантана  баргузор гардид, ки ба  он  собиқадорони ҷанг,  ҷанговарони  интернатсионалист,  намояндагони Сафорати  Русия дар  Тоҷикистон  ва  ғайра  даъват  шуда буданд. 
Ректори намояндагии Донишгоҳи давлатии  Маскав  Абдулҳамид  Нозимов  зимни  суханони  табрикотиаш   зикр  намуд, ки  кишвари  мо  ҳар  сол  моҳи  май  Рӯзи  Ғалабаро ид  мекунад. Ифтихор  аз  Ғалабаи  бузург ва хотираи  қаҳрамонони  муҳорибаҳо  дар  хотири  халқ  абадӣ боқӣ  мемонад. Зикр  шуд, ки  ҳамдиёрони  мо  ҳам ба Ғалабаи  бузург  саҳми  худро  гузоштаанд. Беш  аз  250  ҳазор  нафар тоҷикистониён  зидди душмани  қаттол  ҳарбу  зарб  намуда,  49  нафар  ҷанговарони тоҷик сазовори  унвони Қаҳрамони  Иттиҳоди  Шӯравӣ шуданд. Дар  ин  ҷанг  90  ҳазор  нафар ҳамдиёрони  мо  ҳалок  гардиданд.
Сипас собиқадори  Ҷанги  Бузурги  Ватанӣ  Олег  Соболев ёддоштҳояшро  дар  бораи  қаҳрамонии  ҷанговарони  шӯравӣ  баён  кард. 
Дар  анҷоми  маҷлиси  ботантана  барномаи  консертии  донишҷӯёни  донишгоҳ  манзури  ҳозирон  гардид.