Тоҷикистон аз рӯи теъдоди муҳоҷирон дар Тамбов мақоми чорумро касб мекунад

Душанбе, 14.05.2014. (АМИТ «Ховар, Екатерина Пасторова). – 13 май дар Намояндагии Маркази илму фарҳанги Русия маросими муаррифии вилояти Тамбов, ки дар «Барномаи давлатии мусоидат ба муҳоҷирати ихтиёронаи ҳамватанон ба Федератсияи Русия» иштирок дорад, баргузор гардид.Дар маросими муаррифӣ роҳбарони минтақаҳои Тамбов – Сергей Манн аз ноҳияи Мордовский, Михаил Данилкин аз ноҳияи Никифировский иштирок намуданд. Роҳбарии ҳайати вилояти Тамбовро сардори Раёсати меҳнат ва шуғли аҳолии вилоят Михаил Филимонов ба уҳда дошт. Сардори шуъбаи татбиқи Барномаи давлатии Раёсати меҳнат ва шуғли аҳолии вилояти Тамбов Светлана Каменева, ки ба шаҳри Душанбе омадааст, дар ҷараёни мулоқот ба ҳозирон хабар дод, ки дар давраи иҷрои Барномаи давлатӣ беш аз 3000 нафар ҳамватанон аз кишварҳои мухталифи собиқ Иттиҳоди Шӯравӣ барои сукунати доимӣ ба вилояти Тамбов омадаанд.Ба гуфтаи Светлана Каменева, Тоҷикистон аз нигоҳи муҳоҷират ба вилояти Тамбов ҷойи чорумро ишғол менамояд. Тайи се соли охир аз Тоҷикистон 20 нафар корманди соҳаи тиб барои иқомати доимӣ ба ин ҷо омад.Дар ҷараёни мулоқот зикр шуд, ки вилояти Тамбов имконияти ҳар сол қабул намудани 700 нафар муҳоҷирро дорад.