Вазъи санитарию экологӣ дар меҳвари ҷаласаи шаҳрдорӣ

  Душанбе,13.05.2014.(АМИТ «Ховар», Марзия Саидзода).-Вазъи санитарию экологии пойтахт дар фасли гармо, хусусан сари вақт баровардани партовҳо аз ҳудуди шаҳраку маҳаллаҳо ва ҷилавгирӣ аз хуруҷи ҳар гуна бемориҳои сироятӣ аз масъалаҳое буд, ки зимни баргузории ҷаласаи васеи шаҳрдорӣ матраҳ гардид. Дар ин росто Маҳмадсаид Убайдуллоев-раиси шаҳри Душанбе ба масъулини соҳаҳои марбутаи пойтахт, бахусус сохторҳои назорати давлатӣ супориш додааст, ки ҳолати баровардани партовҳоро аз шаҳр дар соатҳои муайянгардида, инчунин коркарди санитарии нақлиёти партовкашро баъди бозгашташ аз партовгоҳ ба пойтахт таҳти назорат қарор диҳанд.
  Вобаста ба беҳдошти вазъи санитарию экологии пойтахт раиси шаҳр аз сокинони пойтахт даъват ба амал овардааст, ки дар ин самт бетарафӣ зоҳир накарда, дар ҳолати ҷой доштани мушкилот вобаста ба вазъи санитарию экологии шаҳр тавассути сомонаи www.mometavonem.tj иттилоъ пешниҳод намоянд.