10 кг ҳашиш дар мошинҳои гуногунтамға

Душанбе, 23.10.2014.(АМИТ «Ховар», Мавҷуда Анварӣ).-Мақомоти полис дар дидбонгоҳи доимии “Сурхоб”-и ҳудуди ноҳияи Ҳамадонӣ  ҳангоми азназаргузаронии бағоҷи мошини тамғаи “Opel Astra”, рақами давлатиаш ТҶ 61-15 АК 03 ба миқдори 3 килою 600 грамм маводи нашъадори ҳашиш дарёфт ва мусодира намуданд. 
Мошини боздоштгардида ба сокини ҳамин ноҳия Маҳманазар Насимови 28-сола, ки пеш суд шудааст, тааллуқ дорад. 
Ҳамчунин  кормандони РВКД дар шаҳри Душанбе дар кӯчаи Маяковскии пойтахт шаҳрванд Айёмиддин Абдуллоеви 26 сола, ки  муваққатан истиқоматкунандаи шаҳри Душанбе аст, бо гумони даст доштан дар гардиши ғайриқонунии маводи мухаддир дастгир намуданд. 
Дар вақти азназаргузаронии мошини шахсиаш тамғаи “ Toyota Mark II ”, рақами давлатиаш ЕН  73-71 01 РТ аз дохили бағоҷи он 5 килою 148 грамм маводи нашъадори ҳашиш дарёфт ва мусодира шуд.
 Дар кӯчаи Айнӣ шаҳрванд Собир Шомаҳмадови 33-сола,   муваққатан истиқоматкунандаи шаҳри Душанбе дастгир  шуд. Зимни азназаргузаронии хонаи истиқоматиаш аз дохили ҳаммом зиёда аз 2 кило   маводи нашъадори ҳашиш дарёфт гардид.
Тайи ин ду рӯз, аз 21 то 23 октябр маводи нашъадори мусодирашуда дар маҷмӯъ 10 килою 826 граммро ташкил дод.
Нисбат ба далелҳои мазкур парвандаи ҷиноятӣ оғоз гардида, тафтиш идома дорад.