Қарзҳои имтиёзнок ба муҳоҷирони дохилии Шўрообод

    Душанбе, 31.10.2014. (АМИТ «Ховар», Лайло Тоирӣ).- Бо мақсади инкишофи минбаъдаи хоҷагии халқ ва бо назардошти захираҳои зиёди меҳнатӣ ноҳияҳои қабулкунандаи муҳоҷирони дохилӣ аз имкониятҳои мавҷуда самаранок истифода бурда, мавзеи ҷойгиршавии маҳалли нави аҳолинишинро интихоб намуда, барои қабул ва ҷобаҷокунии муҳоҷирони дохилӣ, фароҳам овардани шароитҳои мусоид барои онҳо тадбирҳои заруриро андешида истодаанд.
28-29 октябри соли 2014 бо иштироки кормандони Раёсати Хадамоти муҳоҷират дар вилоят ва намояндагони мақомоти иҷроияи ҳокимияти давлатии ноҳия ба 20 оилаи муҳоҷирони дохилии ноҳияи Шўрообод, дар ҳудуди ҷамоати деҳоти «Обшорон» аз ҳисоби заминҳои ғайрикишоварзии хоҷагии деҳқонии «Ватан» 0, 10 га. қитъаи замин барои сохтмони манзили истиқоматӣ ҷудо шуд. Муҳоҷирон аллакай ба корҳои сохтмонӣ шуруъ намуданд. 
Тавре ки аз Хадамоти муҳоҷирати Вазорати меҳнат, муҳоҷират ва шуғли аҳолӣ хабар доданд, ба унвонии Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон рӯйхати 20 нафар сардорони муҳоҷирони дохилӣ барои ҷудо намудани қарзҳои имтиёзнок  пешниҳод гардида,  рӯзҳои наздик ба ҳамаи муҳоҷирони дохилӣ қарзҳои имтиёзнок дода мешаванд.