Ҳаҷми маҳсулоти кишоварзӣ афзоиш меёбад

Душанбе, 22.10.2014. (АМИТ «Ховар», Кристина  Эрлих). –  Аз  моҳи  январ то  моҳи  сентябри  соли  2014  ҳаҷми  маҳсулоти  умумии  кишоварзии  кишвар 13  миллиарду  963  миллиону 700  ҳазор  сомониро ташкил  дод, ки  нисбат ба  ҳамин  давраи  соли  2013  баробари  се  фоиз  зиёд  аст. Дар  ин  бора  аз Агентии  омори   назди  Президенти  ҶТ  ба  АМИТ «Ховар»  хабар  доданд.
Хоҷагиҳои   ҷамъиятию  деҳқонӣ  то  1  январи  соли  ҷорӣ дар  масоҳати 6304  гектар  зироатҳои тирамоҳӣ  кишт  карданд, ки  5760  гектари  онро  майдони  сабзавот ташкил  медиҳад.  Ҳамчунин  дар  масоҳати 544  гектар   зироатҳои  хӯроки  чорво кишт  шудаанд, ки  нисбат  ба  ҳамин  давраи  соли  гузашта баробари  38,2  фоиз  камтар  аст. 
Ҳамаи  хоҷагиҳои  кишвар  дар  масоҳати  7265  гектар боғҳои нав барпо  намудаанд, ки   назар  ба  ҳамин  давраи  соли  2013 баробари  19,7  фоиз  кам  аст.  Масоҳати  токзорҳои  нав  571  гектарро ташкил  медиҳад, ки  назар  ба  ҳамин  давраи  соли  гузашта  19,8  фоиз  кам  мебошад.