Ҳам намоишгоҳу ҳам консерт

Душанбе, 23.10.2014. (АМИТ «Ховар», Марҳабои  Азамат). – Тавре ки  аз Маркази  фарҳанги «Бохтар»  ба  АМИТ «Ховар»  хабар  доданд,  25  октябр соати 14.00  дар Осорхонаи  миллии  Тоҷикистон  намоишгоҳи асарҳои  рассомони  Аврупо  бо истифода аз расмҳои хазинаи  осорхона баргузор  мегардад. 
Назар ба  иттилои  манбаъ,  шоми  ҳамон  рӯз  дар  Театри  опера  ва  балети  ба  номи  С.Айнӣ консерт бо  истифода аз  асарҳои  бастакорони  Аврупо  дар  иҷрои  устодони  санъати  Тоҷикистон  баргузор  мешавад. «Ҳар  ду  чорабинӣ оғози Ҳафтаи  Аврупо   дар  Тоҷикистон  ба  шумор  мераванд, ки то  2  ноябр идома  меёбад», — зикр  намуданд  дар Маркази  фарҳанги «Бохтар».
Ёдовар  мешавем, ки бо  ибтикори Маркази  фарҳанги  «Бохтар» ва  мушорикони он аз қабили IDEA, Намояндагии  Швейтсария, Сафорати  Фаронса   дар  Тоҷикистон, Beeline (Белайн) ва  дастгирии  Вазорати  фарҳанги  Ҷумҳурии  Тоҷикистон аз  25  октябр  то  2  ноябр  дар  Тоҷикистон  Ҳафтаи  Аврупо оғоз  меёбад.