Ҳамкориҳо густариш меёбанд
Душанбе, 28.10.2014. (АМИТ «Ховар», Раъно Нусратуллозода).-24 октябри соли равон дар Донишкадаи молия ва иқтисоди Тоҷикистон (ДМИТ) бахшида ба ҷашни 20-солагии Конститутсия (Сарқонун)-и Ҷумҳурии Тоҷикистон дар мавзӯи «Конститутсия — кафили рушди мақомоти гумруки Ҷумҳрии Тоҷикистон» мизи мудаввар доир гардид.
Дар ҳамоиш ректори донишкада Ашӯрбой Солиев сухан гуфта, афзуд, ки Донишкадаи молия ва иқтисоди Тоҷикистон барои Хадамоти гумрук мутахассисони баландпояро омода менамояд ва ҷамъомади имрӯза ҳам барои вусъати ҳамкориҳои дуҷониба заминаи воқеӣ мегузорад.
Зикр шуд, ки саҳми ин сохтор дар ғанигардонии буҷаи давлатӣ зиёд аст ва беш аз 40%-и буҷаи давлатро маҳз ҳамин сохтор ворид менамояд.
Дар самти ҳамкориҳои дуҷониба бо ДМИТ зикр шуд, ки донишҷӯёни ихтисоси фаъолияти гумрукӣ метавонанд дар базаи Донишкадаи такмили ихтисоси мутахассисони Хадамоти гумруки назди Ҳукумати ҶТ доир ба истифодаи таҷҳизоти гумрукӣ дарсҳои амалӣ гузаранд.