Ҳамкории рушди таҳсилоти Русия дар Тоҷикистон

Душанбе, 28.10.2014. (АМИТ «Ховар», Зарангези Латиф).- Имрӯз дар шаҳри Душанбе конфронс дар мавзӯи «Анҷоми Лоиҳаи гранти Барномаи ҳамкории рушди таҳсилоти Русия (READ) — марҳалаи II дар Ҷумҳурии Тоҷикистон ва натиҷаҳои асосии соли аввали имтиҳонҳои марказонидаи дохилшавӣ» баргузор шуд.
Нишасти мазкур бо ташаббуси Маркази миллии тести назди Президенти Ҷумҳурии Тоҷикистон ва дастгирии Бонки ҷаҳонӣ созмон дода шуда, мақсади ҳамоиш муаррифии рушди таҳсилоти Русия- READ мебошад.
Дар конфронс Игор Семёнович Лякин- Фролов- Сафири Фавқулода ва Мухтори Федератсияи Русия дар Тоҷикистон, Патритсия Виверс- Картер- намояндаи Бонки ҷаҳонӣ дар Тоҷикистон, директори Маркази байналмиллалӣ дар соҳаи рушди таҳсилот (CICED), директори иҷроияи шуъбаи Ташкилоти байналмилалии Институти «Ҷамъияти кушода»- Бунёди мадад дар Тоҷикистон,  намояндагони Вазорати маориф ва илми кишвар, ректорони донишгоҳу донишкадаҳои ҷумҳурӣ ширкат варзиданд.
Гуфта шуд, ки бо мақсади ҷорӣ намудани низоми нави имтиҳонҳои марказонидаи дохилшавӣ ба муассисаҳои таълимии таҳсилоти олии касбии Ҷумҳурии Тоҷикистон ва дар ин замина баланд бардоштани сифати таҳсилот дар ҷумҳурӣ 28-уми июли соли 2011 байни Ҳукумати Ҷумҳурии Тоҷикистон  ва бонки ҷаҳонӣ Созишномаи Лоиҳаи гранти «Барномаи ҳамкории рушди таҳсилоти Русия (READ)- марҳалаи II дар Ҷумҳурии Тоҷикистон» ба имзо расид.
Мақсади лоиҳаи гранти мазкур таҳкими иқтидори марказ барои ба таври устувор ҷорӣ намудани ИМД ва низоми тестгузаронии миллии арзёбии дониши хонандагон ва мувофиқат ба стандартҳои байналмилалӣ дар дурнамои дарозмуддат мебошад. 
Мавриди зикр аст, ки иштирокдорони конфронс дар мавзӯъҳои Лоиҳаи гранти «Барномаи ҳамкории рушди таҳсилоти Русия дар Тоҷикистон», «Марҳалаҳои асосии ИМД-2014», «Ҳамкорӣ бо муассисаҳои таҳсилоти олии касбӣ дар доираи ИМД-2014»  ва дигар мавзӯъҳои марбута  сухан гуфтанд.