Ҳамоиши прокуророни генералии давлатҳои узви СҲШ

Душанбе, 20.10.2014. (АМИТ «Ховар», Мавҷуда Анварӣ). — Прокурори генералии кишвар О. Ш. Салимзода дар  ҷаласаи прокуророни генералии давлатҳои узви Созмони Ҳамкории Шанхай, ки 8-уми октябри соли 2014 дар шаҳри Тошканди Ҷумҳурии Ӯзбекистон баргузор гардид, иштирок намуд. 
Прокуророни генералии давлатҳои узви СҲШ  дар бораи таҷрибаи назорати прокурорӣ бобати иҷрои қонунгузории ҳифзи табиат, қонунгузорӣ дар соҳаи ҳимояи ҳуқуқи соҳибкорон ва таъмини ҳуқуқу манфиатҳои ноболиғон табодули назар карданд. 
Дар натиҷаи муҳокимаи масъалаҳо роҳбарони прокуратураҳои генералӣ ба зарурати андешидани чораҳои муассир ҷиҳати ҳифз намудани муҳити атроф ва ҳифозати низоми экологӣ, пешгирии ҳолатҳои истифодаи ғайрисамараноки сарватҳои табиӣ эътимод ҳосил карда, бо дарки он ки субъектони фаъолияти соҳибкорӣ дар рушди иқтисоди бозорӣ, соҳаҳои саноат ва хизматрасонӣ, фаровонсозии бозори дохилӣ бо маҳсулоти босифат ва муқовиматпазир, ташкили ҷойҳои нави корӣ пеш аз ҳама барои ҷавонон ва дар ҳамин замина зиёд намудани даромад ва баланд бардоштани некуаҳволии мардум саҳми босазо доранд, як зумра қарорҳо, аз ҷумла ҷиҳати доир намудани ҷаласаи навбатии прокуророни генералии давлатҳои узви СҲШ   соли 2015 дар Ҷумҳурии Қазоқистонро ба имзо расониданд.