Ҳамоиши сиёсатмадорони ҷавон дар Душанбе

Душанбе, 30.10.2014. (АМИТ «Ховар», Фарзона Достонзода). — 30 ва 31 октябр дар шаҳри Душанбе ҷаласаи дуюми Клуби сиёсатмадорони ҷавони Аврупо ва Осиё баргузор мегардад. Тавре ки аз Бунёди байнидавлатии ҳамкории башардӯстонаи давлатҳои узви ИДМ ба АМИТ «Ховар» хабар доданд, дар ҷаласа сиёсатмадорон, таърихшиносон, журналистон ва иҷтимоишиносони Тоҷикистон, Русия, Қазоқистон, Арманистон, Беларусё Қирғизистон ва Ӯзбекистон иштирок менамоянд. Дар ҷаласа масоили мубрами байналмилалию минтақавӣ ва рушди илми муосири сиёсӣ мавриди муҳокима қарор мегирад. Дастгирии иттилоотию коршиносии равандҳои ҳамгироии Тоҷикистон ва стратегияи Чин дар фазои пасошӯравӣ аз ҷумлаи мавзӯъҳоест, ки барои муҳокима пешниҳод шудаанд. Аз рӯи натиҷаи ҷаласаи клуб маърӯза дар мавзӯи «Масъалаи интихоби рушди Тоҷикистон» таҳия мегардад. Ёдовар мешавем, ки ҷаласаи якуми клуб моҳи сентябри соли равон дар шаҳри Остона ва ҷаласаи дуюми он дар шаҳри Бишкеки Қирғизистон сурат гирифта буд. То охири соли 2014 доир намудани ҷаласаҳои клуб дар шаҳрҳои Минск ва Маскав дар назар аст.