Ҳамоиши вакилони парлумон ва коршиносони ҷавони ИДМ

Душанбе, 22.10.2014. (АМИТ «Ховар»). – Аз  23  то  25  октябр  дар  шаҳри  Санкт – Петербурги  Федератсияи  Русия  аввалин  ҳамоиши  байнипарлумонии  ҷавонон  баргузор  мешавад. 
Тавре  ки   парлумони  кишвар  хабар  медиҳад, ин  чорабинӣ  бо  ибтикори   Шӯрои байнипарлумонии  ИДМ  ва Ассамблеяи  байнипарлумонии  ҷавонони  ИДМ  роҳандозӣ  мешавад. 
Аз ҷониби  Маҷлиси   намояндагони  ҷумҳурӣ  дар  ин  чорабинӣ  кормандони  масъули  дастгоҳи  он  Лоиқ  Нусратов, Беҳрӯз  Икромов  ва  Манижа Расулова  иштирок  менамоянд. 
Мақсад  аз  ҳамоиш  рушди  ҳамкории  байналмилалии  ҷавонон  ва   парламентаризм, ҳамчунин дастгирии фаъолияти сиёсию   шаҳрвандии  ҷавонони  Иттиҳод  аст. 
Дар  кори ҳамоиш  вакилони  ҷавони  парлумонҳои  мухталиф,  намояндагони  мақомоти  идораи  сиёсати  бахши  ҷавонон, ҷунбишҳои  ҷавонон ва  созмонҳои  ҷамъиятӣ,  сохторҳои  машваратию  намояндагии  ҷавонони  мақомоти ҳокимияти  давлатӣ,  ходимони  ҷавони  илм ва маорифу  фарҳанги  давлатҳои  узви  ИДМ  иштирок  менамоянд.