Ҷаласаи Шӯрои ҳамоҳангсозии мақомоти ҳифзи ҳуқуқ

Хоруғ 21.10.2014. (АМИТ «Ховар», Файз Мирасан).-Ҷаласаи Шӯрои ҳамоҳангсозии кормандони мақомоти ҳуқуқ масъалаи фаъолияти раёсати Агентии назорати маводи нашъадори назди Президенти Ҷумҳурии Тоҷикистон дар ВМКБ оид ба ҷилавгирӣ аз истеъмоли маводи мухаддир, хамчунин кори ситодҳои ноҳиявӣ оид ба амалиёти «Кӯкнор-2014»-ро мавриди баррасӣ қарор дод. Дар кори ҷаласаи шӯро роҳбарони идораву муассисаҳои шаҳри Хоруғ, муовинони раисони навоҳии вилоят, собиқадорони меҳнат, намояндагони дин ва толибилмон ширкат доштанд. Сардори раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Бадахшон Муртазо Ҳайдарзода аз афзоиши теъдоди нашъамандон дар минтақа изҳори нигаронӣ карда, зикр намуд, ки зиёд гардидани теъдоди нашъамандон, масоили гирифтани пеши роҳи қочоқчиёни нашъа дар вилоят мушкилоти худро дорад, зеро дар чанд соли охир истеҳсоли ғайриқонунии маводи мухаддир дар Ҷумҳурии исломии Афғонистон рӯ ба афзоиш ниҳодааст ва ин омил ба вазъи ВМКБ низ муассир хоҳад буд.Гуфта шуд, ки шаҳри Хоруғ- маркази маъмурии вилоят бо Ҷумҳурии исломии Афғонистон, ки тавлидкунандаи асосии маводи нашъаовар дар минтақа ва ҷаҳон ба шумор меравад, дар масофаи зиёда аз 20 км ҳамсарҳад мебошад.Бояд гуфт, ки теъдоди нашъамандон ба 868 нафар расида, аз ҳама бештари муътодон дар шаҳри Хоруғ ва ноҳияҳои Шуғнону Рӯшон сабти ном шудаанд.Раёсат дар давоми 9 моҳи соли равон дар ҳамкорӣ бо мақомоти қудратӣ 7 адад амалиёт анҷом дода, беш аз 40 килограмм маводи мухаддирро мусодира кард, се адад нуқтаи фурӯши маводи мухаддир дар шаҳри Хоруғ ва як адад дар ноҳияи Шуғнон барҳам дода шуд.