Ҷамъоварии пардохтҳои ғайриандозӣ аз корхонаҳои давлатӣ

Душанбе, 24.10.2014. (АМИТ «Ховар», Бекназари Абӯбакр). — Бо ташаббуси Кумитаи давлатии сармоягузорӣ ва идораи амволи давлатии Ҷумҳурии Тоҷикистон соли ҷорӣ бори аввал ба даромади буҷети давлатӣ аз ҳисоби фоидаи софи корхонаҳои давлатӣ ва ҷамъиятҳои саҳомие, ки бастаи саҳмияҳои онҳо пурра ба давлат тааллуқ дорад, ҷамъоварии пардохтҳои ғайриандозӣ ба андозаи 10 фоиз аз фоидаи софи ҳамаи намуди корхонаҳои давлатӣ ва дивидендҳо аз фоидаи софи ҷамъиятҳои саҳомие, ки ҳиссаи давлат дар сармояи оинномавии онҳо 100 фоизро ташкил медиҳад, ба роҳ монда шуд. 
Мувофиқи маълумотҳои пешниҳоднамудаи Кумитаи андози назди Ҳукумати Ҷумҳурии Тоҷикистон аз ҳисоби истифодаи дороиҳои давлатӣ фоидаи софи умумии дар соли 2013 бадастовардаи корхонаҳои давлатӣ ва ҷамъиятҳои саҳомии кушодае, ки бастаҳои саҳмияҳои онҳо пурра ба давлат тааллуқ доранд, 158,5 млн. сомониро ташкил додааст ва аз ин маблағ суди саҳмияҳои давлатӣ дар ҳаҷми 15,8 млн сомонӣ ҷудо карда шудааст. 
Кумитаи давлатии сармоягузорӣ ва идораи амволи давлатӣ ба АМИТ «Ховар» иттилоъ доданд, ки ба ҳолати 1 октябри соли 2014 аз ин маблағи умумӣ 10,2 млн. сомонӣ ба буҷети давлатӣ ворид гардидааст, ки аз ин ҳисоб 7,9 млн. сомонӣ ба ҷамъиятҳои саҳомии кушодае, ки бастаҳои саҳмияҳои онҳо пурра ба давлат тааллуқ доранд ва 2,3 млн. сомонӣ ба корхонаҳои давлатӣ рост меояд.