Ҷойгоҳи Абдураҳмони Ҷомӣ дар тамаддуни Шарқ
Душанбе, 21.10.2014. (АМИТ «Ховар», Раъно Нусратуллозода).-Дирӯз дар Донишкадаи молия ва иқтисоди Тоҷикистон бахшида ба 600-солагии шоир ва мутафаккири бузурги Шарқ Мавлоно Абдураҳмони Ҷомӣ зери унвони «Ҷойгоҳи Абдураҳмони Ҷомӣ дар тамаддуни Шарқ» конфронси илмӣ-адабӣ доир гардид.
Ректори донишкада Ашурбой Солиев дар бораи маъруфияти Ҷомӣ ёдрас шуда, афзуд, ки маҳз мутолиаи китоб ин мутафаккири бузургро маъруф кард. Асарҳои безаволи А.Ҷомӣ дар тӯли ин асрҳо дили мардуми дунёро тасхир кардаанд. Таҷлили ҷашни 600-солагии шоири беҳамто ба хотири тоза гаштани ёди таърихӣ ва мукаммал шудани шахсияти ҷавонони мо зарур аст, илова намуд мавсуф.
Устоди кафедраи забонҳои тоҷикӣ ва русӣ Саидамир Сафаров дар маърӯзаи худ «Назаре ба рӯзгори Мавлоно Ҷомӣ» ба аҳамияти тарбиявии осори Ҷомӣ такя намуда, зикр кард, ки агар ба гузаштаи рӯзгори инсоният нигоҳ кунем, мебинем, ки саодати шахс ба гавҳари дониш вобаста аст. Устод Ҷомӣ низ тарафдори илми бо амал буда, андешаҳои ахлоқии ӯ чун гавҳар дар ҳама давру замон талабгор доранд.