Баррасии масъалаҳои рушди иҷтимоӣ

Душанбе, 31.10.2014. (АМИТ «Ховар», Лайло Тоирӣ).- Бо   мақсади иҷрои Қарори Ҳукумати Ҷумҳурии Тоҷикистон дар Вазорати меҳнат, муҳоҷират ва шуғли аҳолии Ҷумҳурии Тоҷикистон 30 октябр дар мавзӯи «Проблемаҳои рушди инсонии Ҷумҳурии Тоҷикистон дар заминаи ислоҳоти муносибатҳои иҷтимоӣ-меҳнатӣ» конфронси илмӣ-амалӣ ба кори худ оғоз намуд. 
Бино ба иттилои Раёсати муносибатҳои байналхалқӣ ва робита бо ҷомеаи вазорат,  онро Муассисаи давлатии «Пажӯҳишгоҳи меҳнат, муҳоҷират ва шуғли аҳолӣ» баргузор менамояд.
Дар чорабинӣ  масъалаҳои рушди иҷтимоӣ, муносибатҳои  меҳнатӣ, танзими раванди муҳоҷирати меҳнатӣ ва омода намудани мутахассисон мутобиқи талаботи бозори меҳнат баррасӣ мегардад.
Аз ҷониби  иштирокчиён доир ба масъалаҳои методологӣ, иҷтимоӣ-иқтисодӣ ва асосҳои ташкили мукаммалгардонии механизми низоми идораи меҳнат ҳамчун низоми комил маърӯзаҳо  хонда мешаванд. 
Кори конфронс  то 31 октябр давом меёбад.