Баррасии вазъи ҳуқуқии муҳоҷирони меҳнатӣ дар Русия

Душанбе, 24.10.2014. (АМИТ «Ховар», Лайло Тоирӣ).-  22 октябри соли ҷорӣ вазири меҳнат, муҳоҷират ва шуғли аҳолии Ҷумҳурии Тоҷикистон Сумангул Тағойзода ва сардори Хадамоти муҳоҷират Анвар Бобоев ба Федератсияи Русия сафар намуданд. 
Дар назар аст, ки С. Тағойзода ва А. Бобоев масъалаҳои вазъи муҳоҷират дар Ҷумҳурии Тоҷикистон ва Федератсияи Русия, мушкилот ва роҳҳои ҳалли онро бо намояндагони дахлдори ин кишвар баррасӣ намоянд.
Бино ба иттилои шуъбаи муносибатҳои байналмилалӣ, робита бо ҷомеа ва ҳамватанони бурунмарзии Хадамоти муҳоҷират, дар рафти ин сафар чораҳои пешгирии муҳоҷирати ғайриқонунӣ ва вазъи ҳуқуқии муҳоҷирони меҳнатӣ-шаҳрвандони Тоҷикистон, ки ба онҳо ворид гардидан ба ҳудуди Русия манъ карда шудааст, муҳокима мегардад.
Таҳияи  усулҳои мувофиқ барои таъмини суғуртаи тиббии муҳоҷирони меҳнатӣ-шаҳрвандони ҶТ ва сертификатсияи сохторҳо ҷиҳати гузаронидани ташхиси тиббӣ дар Ҷумҳурии Тоҷикистон дар ҳудуди ҶТ бо ҳуқуқи додани маълумотномае, ки дар ФР ҳангоми гирифтани иҷозатнома ва патент барои кор эътироф карда мешавад,  инчунин чораҳои пешниҳоди кафолати давлатӣ дар соҳаи таъминоти суғурта ва нафақаи муҳоҷирони меҳнатӣ бо ҷониби Федератсияи Русия масъалагузорӣ мешаванд.