Бинои нави мактаб дар Сағирдашт

   Дарвоз, 22.10.2014. (АМИТ «Ховар», Файз Мирасан).- Дар деҳаи Лангарои ҷамоати Сағирдашти ноҳияи Дарвоз бинои нави мактаб мавриди баҳрабардорӣ қарор дода шуд.  Акнун хонандагони деҳа имкон пайдо намуданд дар назди манзили истиқоматиашон таҳсил намоянд.
  Дар гузашта онҳо ба мақсади таҳсил роҳи дурро пиёда тай менамуданд ва дар фасли сармо ин кор барояшон хеле душвор буд.
Бинои нави мактаби ибтидоӣ дорои 5 синфхона ва  2  утоқи корӣ буда, аз таҷҳизот ва ашёҳои зарурии хониш таъмин шудааст. 
Бунёди бинои мазкур дар натиҷаи ҳамкориҳои судманди Ҳукумати Ҷумҳурии Тоҷикистон бо ташкилотҳои байналхалқӣ бо ҷалби сармояи  хориҷӣ бунёд гардида, бори дигар аз сиёсати дарҳои кушод дар кишвари соҳибистиқлоламон гувоҳӣ медиҳад.