Боздиди О.Гаврук аз МОИ «Суғд»

Душанбе, 20.10.2014. (АМИТ «Ховар», Лайло  Тоирӣ). — Ҳафтаи  гузашта  сафири  Беларус  дар  Тоҷикистон  Олга Гаврук бо намояндагони  гурӯҳи  ширкатҳ «АЛЮТЕХ» аз Минтақаи  озоди  иқтисодии Суғд»  боздид  намуд. 
Мувофиқи  маълумоти  маркази  матбуоти  МОИ «Суғд»,  ширкати «АЛЮТЕХ» ба  ҳайси яке  аз қароргоҳҳои  Минтақаи  озоди иқтисодии  Минск  дар  бозори системаҳои роллетӣ мавқеи  пешқадамро   касб  намуда, яке аз  истеҳсолкунандагони  асосии  системаҳои  алюминӣ ва тавораҳои  махсус  дар Аврупои  Шарқӣ ба  шумор  меравад. Ширкати  мазкур  7  корхонаи  истеҳсолӣ ва   беш  аз  25  ширкатҳои  тиҷоратӣ воқеъ дар  Чехия,  Русия,  Беларус,  Украина,  Олмон ва  Австрияро  муттаҳид  месозад. 
Мақсад  аз  сафари  ҳайат  шиносоии  намояндагони  ширкат  бо  фаъолияти  МОИ «Суғд»,  ниҳодҳои он  ва  гуфтушунид  бо  ширкатҳои  манфиатдори  сохтмонии  маҳаллӣ  буд. 
Боздиди  сафир  ба  манзури санҷиши  муфассали натиҷаи аҳду  паймоне  буд, ки  дар  ҳошияи   сафари Президенти  Ҷумҳурии  Тоҷикистон  Эмомалӣ  Раҳмон  ба  Беларус 23 — 25  майи  соли  ҷорӣ  ба даст омада буд. 
Дар  анҷоми сафар аҳд  шуд, ки муносибатҳои байни истеҳсолкунандагони  системаҳои  алюминии  Беларусу  Тоҷикистон  рушду  густариш  дода шаванд.