Бунёди клиникаҳои сайёр дар деҳот

Душанбе, 27.10.2014.(АМИТ «Ховар», Мавҷуда Анварӣ).- Дар ҳошияи баргузории нахустин анҷумани сармоягузории Созмони Ҳамкории Исломӣ барои кишварҳои Осиёи Марказӣ байни Ҳукумати Ҷумҳурии Тоҷикистон ва Бонки исломии рушд Созишномаи лоиҳаи дастрасӣ ва истифодаи клиникаҳои сайёр дар деҳот ба имзо расид.
Созишномаро вазири молияи Ҷумҳурии Тоҷикистон Абдусалом Қурбонов ва Президенти Бонки исломии рушд Аҳмад Муҳаммад Алӣ  ба имзо расониданд.
Ҳадафи лоиҳа ин ба истифода додани 5 клиникаи мобилӣ дар ноҳияҳои дурдасти Тоҷикистон мебошад.
Мақомоти татбиқкунандаи лоиҳа Вазорати тандурустӣ ва ҳифзи иҷтимоии аҳолии Ҷумҳурии Тоҷикистон буда, давраи татбиқи он  панҷ сол  мебошад.
Ҳудуди татбиқи лоиҳаи мазкур барои сохтмони клиникаҳои мобилӣ як қисми Вилояти Мухтори Кӯҳистони Бадахшон, вилояти Хатлон ва қисми ҷанубии ноҳияҳои тобеи марказро дар бар мегирад.