Бунёди терминали боркашонӣ ҳамлу нақли борҳоро меафзояд

               Душанбе ,31.10.2014.(АМИТ «Ховар», Марзия Саидзода).-Алҳол  «Фурудгоҳи байналмилалии Душанбе» бо 21 ширкати ҳавопаймоии ватанию хориҷӣ ҳамкорӣ дорад. Аз он 14 ширкати ҳавопаймоии кишварҳои Иттиҳоди Давлатҳои Мустақил, 5 ширкати ҳавопаймоии кишварҳои хориҷаи дур ва 2 ширкати ҳавопаймоии ватанист. 
            Муҳаммадюсуф Шодиев -масъули бахши матбуоти «Фурудгоҳи байналмилалии Душанбе» мегӯяд, ки  дар самти ҳамкориҳои байналмилалӣ бо мутахассисони Агентии Ҷопон оид ба рушди байналмилалӣ /JICA/  барномаи такмили фурудгоҳи Душанбе омода  шудааст. Тибқи ин лоиҳа дар фурудгоҳи Душанбе терминали боркашонӣ  бунёд шуда, инчунин системаи фуруди автоматии ҳавопаймоҳо (ILS), низоми чароғакҳои роҳнамо барои фурудоии ҳавопаймоҳо (PALS) ба маблағи  15-20 миллион $ насб мешаванд.
       Бунёди терминали боркашонӣ имкон медиҳад, ки ҳамлу нақли борҳо ба маротиб афзоиш ёфта,  ширкатҳои зиёди ҳавопаймоӣ ба фурудгоҳи Душанбе ҷалб шаванд, инчунин  низоми нави фурудоӣ имкон медиҳад, ки бехатарии парвозҳо дар ҳама гуна ҳолат пурра таъмин гардида, имкони истифодаи хати нишасту парвоз аз ду самт таъмин гардад.