Чаро қурби евро ва доллари ИМА баланд шуд?

Душанбе, 21.10.2014. (АМИТ «Ховар», Лайло Тоирӣ)-Тайи чанд рӯзи ҳафтаи гузашта қурби доллари ИМА дар нуқтаҳои мубодилаи асъори ҷумҳурӣ зери таъсири омилҳои берунӣ ва дохилӣ — паст шудани қурби асъори кишварҳое, ки бо онҳо Тоҷикистон ҳамкории тиҷоратии қавӣ дорад, афзоиши мавсимии талабот ба асъори нақд аз ҷониби воридоткунандагон ва аҳолӣ тамоюли баландшавиро соҳиб гашта, ба ҳисоби миёна ба 5,1730-5,1930 сомонӣ баробар шуд. 
      Ҳамзамон, қурби миёнаи рубли русӣ то ба 0,1260-0,1275 сомонӣ барои як рубли русӣ паст фаромада, қурби евро каме баланд шуда, як евро 6,4695-6,5320 сомониро ташкил намуд. 
Бино ба иттилои хадамоти матбуоти Бонки миллии Тоҷикистон, 17 октябр қурби миёнаи доллари ИМА дар нуқтаҳои мубодилаи асъори шаҳрҳои Душанбе ба 5,1740-5,1970 сомонӣ, Хуҷанд ба 5,2050-5,2150 сомонӣ ва Қурғонтеппа ба 5,1800-5,2000 сомонӣ баробар буд.