Дар соҳаи сохтмон музди меҳнат аз ҳама зиёд аст

Душанбе, 20.10.2014. (АМИТ «Ховар», Лайло Тоирӣ)-Мутобиқи маълумоти расмии оморӣ то  ҳолати 1 августи  соли 2014 музди меҳнати миёнаи кормандони ҷумҳурӣ 833,89 сомониро ташкил дода, нисбат ба ҳамин давраи соли гузашта 22,3 % афзудааст. 
Бино ба иттилои Вазорати меҳнат, муҳоҷират ва шуғли аҳолӣ, дар нуҳ моҳи соли равон  дар соҳаҳои бахши воқеӣ музди меҳнати аз ҳама зиёд дар соҳаи сохтмон (1846,94 сомонӣ), саноати истихроҷи маъданҳои кӯҳӣ ва коркарди конҳо (1693,21 сомонӣ), неруи барқ, гази табиӣ ва таъминоти об (1305,43 сомонӣ)  буда, сатҳи пасттарини он дар кишоварзӣ, шикор ва ҷангалпарварӣ (236,68 сомонӣ) ба қайд гирифта шудааст. Сатҳи музди меҳнати соҳаҳои номбурда нисбат ба соҳаи кишоварзӣ мутаносибан 7,8 маротиба, 7,1 маротиба  ва 5,5 маротиба фарқ дорад. Дар соҳаҳои бахши хизматрасонӣ музди меҳнати кормандони фаъолияти молиявӣ 2148,53 сомониро ташкил намуда, сатҳи он нисбат ба дигар соҳаҳо хеле баланд мебошад. Тафриқаи байни музди меҳнати кормандони соҳаи номбурда ва кормандони соҳаҳои тандурустӣ ва хизматҳои иҷтимоӣ — 3,2 маротиба (668,85 сомонӣ), фарҳанг ва варзиш — 2,57 маротиба (837 сомонӣ), маориф — 2,85 маротиба (754 сомонӣ), соҳаи илм — 2,18 маротиба (985 сомонӣ) ва кормандони мақомоти идора — 2,3 маротиба (923,40 сомонӣ) мебошад.
Хароҷоти пулӣ ва амонатҳои аҳолӣ дар моҳҳои январ — июли   соли равон 19253,5 млн. сомонӣ, аз ҷумла: барои хариди молҳо ва пардохти хизматрасонии аҳолӣ 47,6 фоиз ва барои пардохтҳои ҳатмӣ ва ҳаққи узвияти ихтиёрӣ 22 фоизро ташкил дод.