Дав барои саломатӣ

Ҳамадонӣ, 29.10.2014. (АМИТ «Ховар», Сулаймони Хол)- Дар ноҳияи Мир Саид Алии Ҳамадонӣ бо ташаббуси мақомоти иҷроияи ҳокимияти давлатӣ ва шуъбаи маориф, шуъбаи тандурустӣ ва Ташкилоти байналмилалии наҷоти кӯдакон дар Тоҷикистон бахшида ба рӯзи ҷаҳонии амалиёти «Дав барои ҳаёт», ки ҳамасола дар нимаи дуюми моҳи октябр доир мешавад, чорабинӣ барпо шуд.Алишер Исоев, мудири шуъбаи маорифи ноҳияи Ҳамадонӣ вобаста ба ин мавзӯъ гуфт, ки чорабиниҳои рӯзи ҷаҳонии амалиёти «Дав барои ҳаёт» ҳар сол дар гӯшаҳои гуногуни мамлакат таҷлил мешаванд ва наврасону ҷавонони ноҳияи Ҳамадонӣ аз баргузории чунин чорабинӣ дар маркази ноҳия хушнуд гардиданд.Дар чорабинӣ аз ҳисоби хонандагони муассисаҳои таълимӣ ду даста ташкил гардид, ки онҳо дар мусобиқаи дав байни ҳам қувваозмоӣ карданд ва бо нишон додани чусту чолокӣ аъзоёни дастаи Спартак қаблан масофаи муайяншударо тай намуда, ғолиб гардиданд. Хадафи асосии чорабинии мазкур тарғиби ташаккули тарзи ҳаёти солим байни кӯдакону наврасон мебошад.