“Диёри ҳусн”-фестивали байналмилалӣ дар Душанбе

Душанбе, 30.10.2014 (АМИТ «Ховар, Фарзонаи Давлат»).- “Диёри ҳусн”- таҳти чунин унвон  аз  6-ум то 9-уми ноябри соли равон дар Муассисаи давлатии “Душанбе Плаза” 8-умин фестивали байналмилалии ҳунарҳои мардумӣ баргузор мешавад.
Тавре ки дар ин бора аз Бунёди байналмилалии ҳунарҳои мардумии Тоҷикистон “Ҳафт пайкар” хабар доданд, мақсад аз баргузории фестивали мазкур эҳё ва рушди ҳунарҳои мардумӣ, дар сатҳи байналмилалӣ муаррифӣ намудани осори косибони кишвар, ба намоиш гузоштани либосҳои миллӣ ва мӯди суосир  ва ба ин васила боло бурдани эътибори анъанаҳои Тоҷикистон мебошад.
Гуфта мешавад, ба ин падидаи фарҳангӣ, ки  ба 90-солагии шаҳри Душанбе бахшида шудааст, ҳунармандону косибон аз кишварҳои Осиёи Марказӣ, Афғонистон ва Эрон даъват гардидаанд.