Душанбегиҳо ҳунарнамоии «Тенор 21 века» — ро қадр карданд

Душанбе, 20.10.2014. (АМИТ «Ховар», Марҳабо Азамат). — 18  октябр  дар  Филармонияи  давлатии  Тоҷикистон  ба  номи Акашариф  Ҷӯраев  консерти  бошукӯҳи  дастаи  машҳури  мусиқии «Тенор 21 века»- и  Русия  баргузор гардид. 
Сокинони  шаҳри  Душанбе  ва  меҳмонони  пойтахт шоҳиди ҳунарнамоии  беҳтарин  дастаи  ҳунарии  Русия  гардиданд, ки  дар  Австрия,  Куриёи  Ҷанубӣ,  Лубнон,  Латвия, Беларус,  Қазоқистон  ва  Кипр  маҳорати  худро  намоиш  додааст. 
Мутрибу роҳбари  барномаи «Тенор 21  века»  Дмитрий Сибиртсев ба  ҳозирон аз  фаъолияти   дастаи  ҳунарии  мухтасар  нақл  карда  ва  барномаи онро  манзури  ҳозирон  намуд. Мавсуф  ҳамчунин  зикр  намуд, ки  сарояндагони   дастаи  мазкур дар Театри давлатии академии калони  Русия, Театри  академии  Маскав  ба  номи Станиславский  ва  Немирович — Данченко, Театри  операи  нави  Маскав  фаъолият  доранд. 
Ҳаводорони санъати  шаҳри  Душанбе ҳунарнамоии ин  дастаи  машҳури  Русияро  бо кафкӯбиҳо  маъқул  ёфта,  ба аъзои он  изҳори  миннатдорӣ  карданд.
Дар  анҷоми  консерти  бошукӯҳ  роҳбарияти  Вазорати  фарҳанги  ҶТ ва  Филармонияи  давлатӣ  як  сабад  гулдастаҳои тару  тозаро ба  меҳмонон  тақдим  карданд.
Ёдовар  мешавем, ки ин  консерт  бо  ибтикори  Муассисаи  давлатии консертии «Базморо» дар  ҳамкорӣ  бо Ширкати  давлатии  консертии «Содружество» -и  Русия роҳандозӣ  шуд.