Э.Раҳмон: 70 фоизи захираи ҷаҳонии нафт дар ҳудуди кишварҳои СҲИ

Душанбе, 27.10.2014. (АМИТ «Ховар», Зарангези Латиф).- Имрӯз Сарвари Давлат Эмомалӣ Раҳмон зимни суханронии хеш дар Форуми якуми сармоягузорӣ дар доираи Нақшаи амали Созмони Ҳамкории Исломӣ оид ба ҳамкорӣ бо кишварҳои Осиёи Марказӣ зикр намуд, ки дар ҳудуди кишварҳои аъзои созмон қариб 70 фоизи захираҳои ҷаҳонии нафт ва 50 фоизи захираҳои ҷаҳонии газ ҷойгир буда, ин омил аз мавқеи муҳим доштани онҳо дар иқтисоди ҷаҳонӣ шаҳодат медиҳад.Ҳамчунин дар ҷараёни суханронӣ илова намуд,ки:- «Дар баробари ин, мо умедворем, ки нақши Созмони Ҳамкории Исломӣ дар таҳкими ҳамкориҳои кишварҳои исломӣ ва рушди устувори мамлакатҳои аъзои он рӯз аз рӯз зиёд шуда, ба афзоиши саҳми муштараки онҳо дар арсаи байналмилалӣ мусоидат хоҳад кард».«Қисмати зиёди кишварҳои аъзои созмон хавфи таъсири манфии таҳдидҳои ҷаҳонӣ, аз ҷумла оқибатҳои буҳрони молиявию иқтисодӣ, сатҳи баланди камбизоатӣ, дастрасии маҳдуд ба оби тоза, озуқаворӣ, неруи барқ ва дигар маҳсулоту хизматрасониҳои ниёзи аввал, камбудиҳо дар соҳаҳои маориф, тандурустӣ, паҳншавии бемориҳои сирояткунанда, тағйирёбии иқлими сайёра ва тамоюлҳои зудтағйирёбандаи ҷаҳониву минтақавӣ таҳдид мекунад»-, афзуд Президенти мамлакат Эмомалӣ Раҳмон.