Хатлон -пешсафи маъракаи даъвати ҳарбӣ

Душанбе, 31.10.2014. (АМИТ «Ховар», Муқаддас Темурзода).-«То 31 октябри соли ҷорӣ дар ҷумҳурӣ нақшаи даъвати ҳарбии ҷавонон ба сафи Қувваҳои мусаллаҳи ҶТ 83,28% иҷро гардид». Дар ин бора ба АМИТ «Ховар» корманди масъули маркази матбуоти Вазорати мудофиаи кишвар Бахтиёр Бозоров иттилоъ дод.
Сарчашма ҳамчунин хабар дод, ки то имрӯз аз ноҳияҳои тобеи марказ 74,1% ҷавонон ба хизмати ҳарбӣ фиристода шуданд. Дар вилояти Суғд нақшаи мазкур 82,1 %, дар ВМКБ  94,7% иҷро гардид. Дар вилояти Хатлон 98,1 %, дар комиссариатҳои ҳарбии 4 ноҳияи шаҳри Душанбе иҷрои нақша ба 75% расид.
Маврид ба зикр аст, ки якчанд ноҳияи кишвар, аз ҷумла ноҳияҳои Дарвоз, Ишкошим, Мурғоб, Рӯшон, Роштқалъа ва Шуғнони вилояти ВМКБ, шаҳри Норак ва ноҳияҳои Ҳамадониву Ҷиликӯли вилояти Хатлон, ҳамчунин шаҳри Қайроққум ва ноҳияи Ғончии вилояти Суғд нақшаи даъвати тирамоҳиро 100% иҷро намуданд. 
Ноҳияҳои Истиқлолу Шаҳристони вилояти Суғд ва ноҳияҳои Балҷувон, Хуросон, Темурмалик ва шаҳри Қурғонтеппаи вилояти Хатлон нақшаи мазкурро барзиёд иҷро карданд.
Ёдовар мешавем, ки нақшаи тирамоҳии даъвати ҳарбии ҷавонон ба сафи Қувваҳои мусаллаҳ ҳамасола аз 1 октябр оғоз гардида, то 30 ноябр идома меёбад.