Ихтирои 8 навъи нави картошка аз сӯи олимон

 Душанбе, 30.10.2014.(АМИТ «Ховар», Марзия Саидзода).-Дар зарфи 9 соли фаъолияти илмию тадқиқотии пажӯҳишгоҳҳои соҳавӣ дар Тоҷикистон 8 навъи нави картошка, ки баъд аз нон маҳсулоти дуюминдараҷа  барои  аҳолии кишварамон маҳсуб меёбад,  ихтироъ  шудааст. 
        Изатулло Сатторӣ -президенти Академияи илмҳои кишоварзии Тоҷикистон дар Маҷлиси Ҳукумати Ҷумҳурии Тоҷикистон 29 октябр доир ба ҷараёни корҳои селексионӣ ва минтақабобкунӣ дар истеҳсоли тухмии картошка дар назди кабинаи Ҳукумати ҷумҳурӣ гузориш дод. Зикр шуд, ки майдони кишти картошка дар тамоми шаклҳои хоҷагидорӣ дар Тоҷикистон то 1 сентябри соли равон 36,3 ҳазор гектарро ташкил медиҳад ва аз ҳар гектар аз 160 то 400 сентнерӣ ҳосил бояд ҷамъоварӣ  шавад. Дар иртибот ба рушди соҳаи картошкапарварӣ дар кишвар  Академияи илмҳои кишоварзӣ ва дигар сохторҳои марбута вазифадор шуданд, ки барои ихтирои навъҳои нави пешпазак ва миёнапазак, васеъ намудани майдони кишти тирамоҳӣ, баҳорӣ ва такрории картошка тадбирҳои зарурӣ андешанд.