Иштироки Тоҷикистон дар “Таъвиз”

Душанбе, 22.10.2014.(АМИТ «Ховар», Мавҷуда Анварӣ).- Бо мақсади пешгирии қочоқи прекурсорҳо аз 10 то 20 октябри соли равон дар нуқтаҳои гузаргоҳи назоратии гумрукии давлатҳои Афғонистон, Эрон, Қазоқистон, Қирғизистон, Покистон, Тоҷикистон ва Ӯзбекистон амалиёти байналмилалии “Таъвиз” (Подмена) доир гардид. Агентии назорати маводи нашъаовари назди Президенти ҶТ дар ҳамкорӣ бо Хадамоти гумруки назди Ҳукумати ҶТ дар муҳлати муқарраргардида амалиёти “Таъвиз”-ро дар 34 нуқтаи гузаргоҳи гумрукии кишвар, аз ҷумла 5-то ҳавоӣ, 4-то роҳи оҳан, 1-то обӣ ва 24-то нақлиёти (заминӣ) автомобилӣ баргузор намуд.
Бо мақсади доир намудани ин амалиёт 21 гурӯҳи муштараки фаврӣ аз ҳисоби кормандони Хадамоти гумрук ва Агентии назорати маводи нашъаовари кишвар таъсис гардид, ки он дар давоми даҳ шабонарӯз 1 ҳазору 460 адад нақлиёти заминии боркаш, асосан дар нуқтаҳои гузаргоҳи гумрукии “Панҷи Поён”, “Кулма” ва “Қарамиқ”-ро аз назар гузаронид.
Тибқи иттилои АНМН, дар ин амалиёт ягон ҳодисаҳои интиқоли ғайриқонунии прекурсорҳо, воридоти қонунии прекурсорҳо, воридоти қонунии маводи кимиёвии кислотаи уксуси навъи яхин, атсетилхлорид ва хлориди аммоний ба қайд гирифта нашудааст.