Китоби ёддоштҳои собиқадори матбуот

 
Душанбе, 23.10.2014. (АМИТ «Ховар»,  Муҳаммадориф  Шарифзода). – Чанде  пеш   китоби  ёддоштҳои  журналист, ношир,  узви Иттиҳодияи  журналистони  байналмилалӣ,  собиқадори  матбуот Нарзиқул Обидов таҳти  унвони «Дар  байни  устодон» аз  чоп баромад. 
Муаллиф  дар  китоби  ёддоштҳояш, ки бо  лаҳни  суханронии  басо  форам  таълиф  шудааст,  баробари  баёни  роҳи  зиндагию  фаъолияташ шаммае  аз рӯзгори  қаламкашони  шинохтаи  Нашриёти  давлатии  Тоҷикистон  С. Айнӣ,  М. Раҳимӣ,  С. Ҷавҳаризода,  А. Деҳотӣ,  С. Ғанӣ,  Р. Ҳошим,  П. Толис, М. Беҳбудӣ, Ҳ. Аҳрорӣ,  олимони  номӣ Е. Н. Павловский,  М.  Нарзиқулов, А. Баҳоуддинов, А. Бухоризода, Р. Ғаффоров, Р. Ҳодизода, ҳофизу   шоирон ва  актёрон  А. Бурҳонов,  Б.  Ниёзов, А. Баҳорӣ, Н. Шанбезода, тарҷумону  муҳаррирон И. Раҳматов,  М. Бачаев, И. Маҳвашев,  Э. Мулоқандов,  Н. Почоҷонов ва  дигар  азизонаш  сухан меронад, ки бо  рафтор,  кирдор  ва  гуфтори  худ  дар  таълиму  тарбияаш  саҳм  гузоштаанд.
Боби  алоҳидаи  китоб  ба  латифаҳои  муаллиф   бахшида  шудааст, ки басо  мақбулу  ҷолибанд.
Китоби «Дар байни  устодон» — и  Нарзиқул  Обидов  барги  сабз ва  барои  аҳли  адаб  ва  матбуоти  кишвари  азизамон тӯҳфаи  хубест  .