Мизи мудаввар оид ба қоидаҳои ҳифзи обҳо

Душанбе, 18.10.2014 (АМИТ, «Ховар», Назири Назир).-16-уми октябри соли ҷорӣ дар Кумитаи ҳифзи муҳити зисти назди Ҳукумати Ҷумҳурии Тоҷикистон мизи мудаввар баргузор гардид. 
Масоили асосии мизи гирд-ин баррасии лоиҳаи «Қоидаҳои ҳифзи обҳои рӯизаминӣ» ва «Қоидаҳои ҳифзи обҳои зеризаминӣ» маҳсуб мешуд, ки он  аз ҷониби Муассисаи давлатии “Маркази илмию тадқиқотии ҳифзи захираҳои об” таҳия шудааст. 
Дар ҷараёни мизи гирд мутахассисони МД “Маркази илмию тадқиқотии ҳифзи захираҳои об” Р. Раҳматуллоев ва Н. Сарабеков дар бораи қоидаҳои ҳифзи обҳо маърӯза намуданд. Пасон байни иштирокчиёни мизи мудаввар музокира ҷараён гирифта, ҳозирин  андеша ва пешниҳодҳои мушаххасро оид ба мукаммал намудани қоидаҳои баррасишаванда баён намуданд.
Дар  мизи мудаввар намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон, Вазорати энергетика ва захираҳои оби Ҷумҳурии Тоҷикистон, Агентии беҳдошти замин ва обёрии назди Ҳукумати ҶТ, Саридораи геологияи назди Ҳукумати Ҷумҳурии Тоҷикистон ва Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати ҶТ, инчунин олимони шинохтаи соҳаи оби ҷумҳурӣ ва мутахассисони МД “Маркази илмию тадқиқотии ҳифзи захираҳои об” иштирок намуданд.