Мулоқотҳои М.Убайдуллоев бо роҳбарони Парлумони Русия

          Душанбе, 24.10.2014.(АМИТ «Ховар», Марзия Саидзода).-Масоили марбут ба самтҳои афзалиятноки ҳамкориҳои  гуногунсоҳаи Ҷумҳурии Тоҷикистон ва Русия, хусусан ҳифзи ҳуқуқҳои муҳоҷирони меҳнатии тоҷик дар қаламрави ин кишвар дар меҳвари мулоқоти  раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев бо ҳамтои русаш -раиси Шӯрои Федератсияи Маҷлиси Федералии Федератсияи Русия Валентина Матвиенко қарор дошт.
Дар ҷараёни мулоқот, ки  дар он ҳайати Тоҷикистон низ ҳузур дошт, масъалаҳои мубрами тақвияти равобити ҳасана байни Тоҷикистону Русия дар заминаҳои иқтисоду тиҷорат, ҷалби инвеститсияи Русия ба иқтисоди Тоҷикистон, ҳамкориҳои илму фарҳангӣ ва гуманитарӣ матраҳ гардиданд. Ҳамзамон мусоҳибон бо баррасии авзои феълии минтақа ва ҷаҳон  масоили  марбут ба ҳифзи сарҳадот, муборизаи дастаҷамъона алайҳи терроризм, экстремизм, гардиши ғайриқонунини маводи мухаддир ва таҳдидҳои дигари зуҳуроти номатлуби замони муосирро баррасӣ карданд.
    Инчунин, дар ҷараёни мулоқот ҳолати татбиқи созишномаҳои дуҷонибаи қаблан байни ду кишвар ба имзо расида муҳокима гардид. Дар ин самт  гурӯҳи кории муштарак созмон дода шуд. Таъкид гардид, ки барои амалӣ гардонидани ҳамагуна қарорҳову созишномаҳои қабулгардида дар Форуми байнипарлумонии «Тоҷикистон — Русия: нерӯи ҳамкориҳои байниминтақавӣ»  минбаъд дар 2 сол як маротиба  ва ҷаласаҳои Комиссияи байнипалатавии амалкунанда байни Маҷлиси  миллӣ ва Шӯрои Федератсия соле накам аз 2 бор доир карда шаванд. 
Бояд тазаккур дод, ки раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев зимни сафари расмияш ба Маскав ҳамзамон бо раиси Думаи давлатии Русия Сергей Наришкин мулоқот анҷом дод.